Riyaziyyatı necə öyrənək???

Riyaziyyat fənni bir qədər diqqət  və səbr tələb edir. Şagirdlər bu fənni qavramaqda çətinlik çəkirlər. Bunun əsas səbəbi riyaziyyatın mahiyyətini başa düşməməkdir.

Riyaziyyatı necə öyrənək???????   Bu sualı cavablandırmaq biraz çətindir. Ən doğru cavabı tapmaq üçün riyaziyyatı bilməyən birinə “Riyaziyyatı necə öyrənək ? “ sualını vermək lazımdır.  Onun verdiyi əks cavablar elə riyaziyyatı öyrənməyin üsullarıdır.

Bir- biri ilə qarşılıqlı əlaqəsi olan mərtəbələrdən ibarət   “riyaziyyat binası”  öz təşəbbüskarlığı və bənzərsizliyi ilə daim diqqət mərkəzində olmalıdır.  Bu binanı  inşa etmək üçün təməlini möhkəm qurmaq lazımdır. Riyaziyyatın təməli hesabdır. Sonra isə qazanılan hər bir yeni bilik növbəti mərtəbələri inşa etməyə kömək edir.  Səbrli və diqqətli olmaq lazımdır. Əgər aralarda boşluqlar qalarsa ilk və ən zəif sarsıntıda tikili yerlə yeksan olar. Buna görə də riyaziyyatı öyrənmək üçün sistemli çalışmaq lazımdır. Bəzən bu çətin ola bilər , ancaq məqsədlərə nail olmaq üçün  çox vacibdir

Sinif xaricində nəticə əldə etmək üçün , dərsi diqqətlə dinləmək lazımdır. Elə informasiyalar varki , yalnız müəllim tərəfindən verilir. Müəllimin vurğuladığı sözləri, bilikləri, düsturları qeyd edin. Müəllim izah edərkən dərs asan görünə bilər, lakin çalışma həlli vaxtı gəldikdə heç də asan iş olmadığı anlaşılır. Bu zaman qeydlər sizə kömək edəcək. Əvvəllər həm dərsi dinləyib , həm də qeydlər aparmaq çətin ola bilər. Bir müddət sonra dinlərkən qeydlər aparmaq bəsit olacaq.

Suallar verin, başa düşmürsünüzsə  soruşun. Başa düşməyən tək siz  deyilsiniz. Digərləri də sual soruşduqda həm sualı , həm də cavabı dinləyin və nəticələndirin. Sinifdə 4 – 5 nəfəfrlik qrublar yaradın. Qrublar II, III , IV səviyyələrində olan, riyazi bilik və qavrama qabiliyyətlərinə görə fərqlənən şagirdlərdən təşkil olunsa daha da səmərəli olar. Ümumi qrublarla iş çox faydalıdır. İnsanların baxışları fərqlidir.  Sizin həll edə bilmədiyiniz, çətin olduğunu düşündüyünüz çalışmanı bir başqası daha fərqli sferadan yanaşıb asanlıqla həll edə bilər. Beləliklə qrub üzvləri bir- birinə təsir edərək öz biliklərini inkişaf etdirərlər.

Ev tapşırığı   )))))

Müəllimlər həyatınızı çətinləşdirmək üçün ev tapşırığı vermirlər. Dərsdəki mövzuları möhkəmləndirmək daha doğru mühakimə etməklə məsələləri həll etmə bacarıqlarımızı təkmilləşdirmək üçün ev tapşırıqları verilir.

Riyaziyyat bir çox şagirdin dərsi dinlədikdən sonra hər mövzunu həmin an başa düşəcəyi bir fəndir.  Bəzi şagrdlərin isə mövzunu tam olaraq mənimsəmək üçün çalışmalar, məsələlər həll etməyə ehtiyacı vardır. Ev tapşırığının məqsədi budur. Buna görə də mövzunu qavramağınıza kömək edə biləcək çalışmalar ev tapşırığı olaraq verilir.

Düşün. Ev tapşırığı verilməsə mövzunu qavrayib – qavramadığını bilməyəcəksən, çünkü mövzuya aid çalışma həll etməyəcəksən. Hər dərsdən sonra ev tapşırıqlarını yazın. Müəllimin izahları sizin üçün yeni informasiyadır və bunu həmin gün möhkəmləndirmək lazımdır. İlk bir neçə çalışmanı qeydlərdən istifadə edərək həll edə bilərsiniz. Sonra isə artıq sərbəst çalışmağa cəhd göstərin, çünkü imtahanlarda qeyd dəftəriniz  yanında olmayacaq.

Çox vaxt şagirdlər sualları oxuyur və necə həll edəcəklərini bilmədiyini düşünür. Sualları diqqətlə oxuyun. Sualları bir daha yenidən diqqətlə oxuyun. Artıq hansı məlumatlar veriib və nə soruşulur suallarının cavabını bildiyinizdən əmin olun.Açıq şəkildə məchulu qeyd edin.Sonra verilənləri ardicillıqla açıq bir şəkildə yazın. Plan hazırlayın - çalışmanı həll etmək üçün hansı məlumatlara ehtiyacınız olacağını müəyyənləşdirin. Sizə kömək edəcək düsturları yazın. Əgər həll edə bilməsəniz oxşar bir çalışmanın daha sadə formasına baxın və bir neçəsini  həll edin. Nəhayət əvvəlki çalışmaya qayıdın və etməyə başlayın. Uğurlu nəticə əldə etmək üçün həllər ardıcıllığına diqqət yetirin.

Tətbiq , tətbiq, tətbiq.  Özünüzü müəllimin verdiyi çalışmalarla məhdudlamayın. Nə qədər çox çalışma həll etsəniz bir o qədər problemlə və fərqli həll üsulları ilə qarşılaşacaqsınız.  Riyaziyyatı daha yaxşı öyrənmək  üçün çox çalışmalı və tətbiq etməlisiniz. Necə ki, bir çox uğurlu müəllim , həkim , mühəndis praktika ilə öz ixtisaslarını inkişaf etdirirlər.

Riyaziyyatı öyrənməyə bir digər mane isə  “ maraqsızlıqdır”  Bu işdə təbiət , ətraf aləm  bizə kömək edəcək, çünki riyaziyyat təbətdə , gündəlik həytımızda gizlənmişdir.  Deməli biz həyatımızın hər anında riyaziyyatla qarşılaşırıq. Bu da bizim riyaziyyatı öyrənməyimiz üçün ən təməl səbəbdir.....

                                                                                                                     Ocaqverdiyeva Fidan